Գլխարկները մաքրում են տարբեր ձևերով: Այսպես, ֆետրե գլխարկի (շլյապա) փայլ ստացած տեղերը կարելի է թեթևակի շփել հղկաթղթով կամ, այդ տեղերի վրա մանր աղ ցանելով, կոշտ խոզանակով մաքրել: Կարելի է օգտվել նաև անուշադրի սպիրտի և ջրի կիսախառնուրդով: Այդ լուծույթի մեջ մի փոքր կտոր կոպիտ մահուդ են թրջում և նրանով կեղտոտված տեղերը մաքրում, որից հետո գլխարկը մաքուր չոր շորով շփում են, չոր կոշտ խոզանակով մաքրում և չորացնում:
Ճարպոտված տեղերը և ճարպի կեղտաբծերը կարելի է մաքրել հավասար չափով իրար խառնած անուշադրի սպիրտի և դենատուրատի լուծույթով:
Աղվամազե և բրդե գդակները և բերետները խորհուրդդ չի տրվում լվանալ: Դրանք պետք է մաքրել բենզինով շաղախած այրած մագնեզիումով, այդ շաղախը խտություն պետք է ունենա: Սպիտակ գույնի բերետները, ինչպես և գդակները կարելի է մաքրել լավ որակի կարտոֆիլի ալյուրով: Գլխարկին մի քանի անգամ օսլա (կամ պաստա) են քսում և ապա խնամքով թափ տալիս:
Սպիտակ ծղոտե գլխարկները սկզբում խոզանակի օգնությամբ գոլ օճառի լուծույթով և ջրով լվանում են, այնուհետև գլխարկը սպիտակեցնելու համար այն թրջում են ջրածնի պերօքսիդի 3 տոկոսանոց լուծույթով, չորացնում են և ոչ տաք արդուկով արդուկում:
Գլխարկները կարելի է սպիտակեցնել նաև ջրում բաց արած աղաթթվով (5-6 տոկոսանոց լուծույթ): Այդ լուծույթով գլխարկը խոզանակի օգնությամբ մաքրում են և, այնուհետև, քիչ քանակությամբ անուշադրի սպիրտ խառնած ջրով լվանում: