Խորդենին (գերան) լայն տարածված սենյակային բույս է, որն ունի վառ ծաղիկներ կամ խայտաբղետ տերեւեր: Սենյակային կուլտուրայում հանդիպում են խորդենու տարբեր տեսակներ' կարմիր, սպիտակ, վարդագույն ծաղիկներով և այլն: Խորդենին աճեցնում են կտրոններով' գարնանը և ամռանը (հունիս-օգոստոս):
Ամռանը տնկած կտրոնները արդեն հաջորդ տարվա ապրիլ-մայիս ամիսներին դառնում են լավ ծաղկող բույսեր: Արմատակալած կտրոնները վերատնկում են ավելի ընդարձակ ծաղկամանների մեջ, որոնց հողը պատրաստված է 2 մաս ճմային հողի, 2 մաս տերևահողի և 1 մաս ավազի խառնուրդից: Ջրում են չափավոր կերպով: Ծաղկած բույսերը ձմռանը պահում են 5-6 աստիճանից ոչ բարձր ջերմության պայմաններում, գարնանը վերատնկում են։